אויטאָגראַף — גלאָריאַ פֿײַן־מאַקינג

גלאָריאַ, אַ געבוירענע אין אַ „די־פּי‟־לאַגער, איז דערצויגן געוואָרן אין ברוקלין, ניו־יאָרק, אין אַ ייִדיש־רעדנדיקער משפּחה, וואָס די טאַטע־מאַמע האָבן געשטאַמט פֿון ליטע. ייִדיש איז גלאָריאַס שפּראַך פֿון דער היים. איר טאָג־טעגלעכע שפּראַך אין ניו־יאָרק איז אַוודאי געווען ענגליש, אָבער די נטיה צו קענען אויך אַנדערע שפּראַכן האָט זי געבראַכט צו שפּאַניש און האָלענדיש. זי וווינט אין אַמסטערדאַם און אַרבעט ווי אַ וועג־ווײַזערין פֿונעם ייִדישן מוזיי. אויף דעם פֿעלד פֿון איר טעטיקייט האָבן מיר זיך באַקענט, ווען איך מיט מײַן פֿרוי האָבן פֿאַרבראַכט אַ וואָך אין אַמסטערדאַם. יענער שפּאַציר איבער „ייִדישן אַמסטערדאַם‟, איז אַ דאַנק גלאָריאַ, אײַנגעקריצט געוואָרן אין אונדזער זכּרון אויף לאַנגע יאָרן.